Endurhæfing
Endurhæfing einstaklings er stöðugt meðferðarferli þar sem áhersla er lögð á að styðja einstaklinginn við aðlögun að einkennum, sjúkdómsgreiningum eða fötlun.
Markmið endurhæfingar eru alltaf einstaklingsmiðuð en snúa að því að einstaklingur öðlist aukna færni og sjálfsstæði í daglegu lífi. Í endurhæfingu er stefnt að aukinni samfélagslegri þátttöku.
Hjálp til sjálfshjálpar
Mikil áhersla er lögð á fræðslu og þátttöku sjúklings í sinni endurhæfingu. Endurhæfing er hjálp til sjálfshjálpar. Lögð er áhersla á grunnþætti heilbrigðs lífs, heilsusamlegt mataræði, reykleysi, hæfilega hreyfingu og góðan svefn. Markmið endurhæfingarinnar er að bæta líðan og lífsgæði sjúklings og getu hans til að nýta sér ýmis bjargráð sem honum eru kennd. Lokatakmarkið er að sjúklingurinn eigi sitt sjálfstæða líf, hafi sjálfsákvörðunarrétt yfir því og sé virkur þátttakandi í samfélaginu.
Einstaklingsmiðuð meðferð
Endurhæfing er teymisvinna en einstaklingsmiðuð fyrir hvern sjúkling. Huga þarf að mörgu þegar markmiðið er að auka færni, virkni og þátttöku sjúklings í lífi og starfi og bæta lífsgæði hans. Í meðferðinni þarf m.a. að taka mið af persónulegum þáttum sjúklings (m.a. menntun, fjölskylduhögum, menningu, kyni) svo og umhverfisþáttum (meðal annars búsetu, samfélagi).
Þverfagleg teymisvinna
Starfsemin á Reykjalundi byggir á hugmyndafræði þverfaglegrar teymisvinnu. Sérþekking er innan hvers teymis sem byggir á grunnsjúkdómum þess sjúklingahóps sem unnið er með. Þar sem færniskerðing af völdum sjúkdóma eða slysa er langt í frá sjúkdómabundin er mörgum meðferðarúrræðum beitt þvert á meðferðarteymi.
Endurhæfing byggir á samvinnu fagaðila, sjúklings og hans nánustu eftir atvikum. Beitt er sál-, líkamlegum- og félagslegum aðferðum (biopsychosocial), með það að markmiði að draga úr skerðingu á færni og virkni.