Svana Helen Björnsdóttir, Bjarki Bjarnason, Halla Tómasdóttir, Sveinn Guðmundsson, Jórunn Árnadóttir, Birgir D. Sveinsson, Guðmundur Löve. Ljósmyndari: Christopher Lund

Í tilefni 80 ára afmælis Reykjalundar heimsóttu fulltrúar Reykjalundar og SÍBS Bessastaði þann 16. desember 2025. Svana Helen Björnsdóttir, starfandi forstjóri og stjórnarformaður Reykjalundar, afhenti forseta Íslands, Höllu Tómasdóttur, eintak úr fyrstu útgáfu bókarinnar Reykjalundur – Endurhæfing í 80 ár. Jafnframt afhenti Sveinn Guðmundsson, formaður SÍBS, forseta viðurkenningarskjal og heiðursmerki SÍBS úr gulli, sem þakklætisvott fyrir velvilja og hlýhug til Reykjalundar.

Forseti tók hlýlega á móti gestunum og lýsti yfir miklum áhuga á að heimsækja Reykjalund á næsta ári til að kynna sér starfsemina nánar. Hún rifjaði jafnframt upp að á æskuárum hefði hún tekið þátt í sölu happdrættismiða SÍBS, sem hefur um áratugaskeið stutt starfsemi Reykjalundar og bæri því sérstakan hlýhug til staðarins og starfsins sem þar fer fram.

Heimsóknin var ánægjulegt tilefni til að fagna 80 ára afmæli Reykjalundar og því mikilvæga endurhæfingarstarfi sem þar hefur verið unnið í þágu einstaklinga og samfélagsins alls.

Frú Halla Tómasdóttir, forseti Íslands, tekur við bókinni frá Svönu Helen Björnsdóttir, forstjóra Reykjalundar. Ljósmyndari: Christopher Lund