Föstudagsmolar forstjóra 14. mars 2025.

Ágæta samstarfsfólk hér á Reykjalundi,

Frábær mæting á árshátíðina!
Nú er bara rúm vika í árshátíðina okkar og það stefnir í frábæra mætingu. Búið að er láta almannavarnir vita en eins og frægt er orðið kom dansæði Reykjalundarstafsfólks fram á jarðskjálftamælum á Snæfellsnesi í fyrra (alla veganna segir sagan það). Hlakka heldur betur til og bestu þakkir til árshátíðarnefndarinnar.

Myndatökur fyrir kynningarefni og Reykjalundarsöguna.
Eins og kynnt hefur verið, verður síðar á árinu gefin út bókin Saga Reykjalundar. Það er Pétur Bjarnason sem hefur haldið utan um söguritunina en honum til halds og trausts hefur verið ritnefnd skipuð þeim Bjarka Bjarnasyni, Birgi D. Sveinssyni og Jónínu Sigurgeirsdóttur auk undirritaðs og Ragnars Ólasonar ljósmyndara. Myndin með molunum í dag var einmitt tekin á fundi ritnefndarinnar nýlega. Rósa María Guðmundsdóttir og margir fleiri hafa einnig komið að málum og er sjálfsagt að þakka öllum fyrir aðstoðina og þátttökuna. Bókin mun formlega koma út á haustdögum og verður þá kynnt sérstaklega.
Sem söguleg heimild fyrir bókina, en ekki síður til að nota í kynningarskyni fyrir okkur starfsfólk Reykjalundar við ýmis tækifæri fyrir starfsemi Reykjalundar, verða allar deildir, starfseiningar og meðferðarteymi boðuð í hópmyndatökur á næstunni. Jafnframt tökum við ýmsar myndir úr daglegu starfi. Fyrirkomulag á því verður kynnt sérstaklega en við hvetjum alla til að vera með.

Að lokum fylgja hér hugleiðingar frá formanni stjórnar Reykjalundar endurhæfingar ehf., Guðrúnu Björgu Sigurbjörnsdóttur sem tók við formannsembættinu síðasta sumar.

Góða helgi!
Pétur